ბზვანის მღვიმე

ბზვანის მღვიმე იმერეთის მხარეში, ვანის მუნიციპალიტეტში, სოფელ ბზვანის მიდამოებში მდებარეობს, ზღვის დონიდან 388 მეტრზე. ადგილობრივი მოსახლეობა მღვიმეს „ნავარსკვლავებს“ ან „საქაჯეს“ ეძახის. მღვიმის სიგრძე 450 მეტრია. იგი თავიდან 4 მეტრიანი ჭის სახით იხსნება და მასში ჩაღწევა 10 მეტრიანი ნაპრალის გავლითაა შესაძლებელი. მღვიმე აღმოაჩინა და პირველად აღწერა მეკლდეურმა რომან კაჭკაჭიშვილმა, XX საუკუნის ბოლოს. ვანის მუნიციპალიტეტში ბზვანის მღვიმის აღმოჩენამდე ცალკე კარგად გამოკვეთილი კარსტული მასივი არცერთ სამეცნიერო ლიტერატურაში არ იყო მოხსენიებული. სოფელ ბზვანის ტერიტორიაზე არსებული კარსტული რელიეფი თსუ-ს ზუსტი და საბუნებისმეტყველო მეეცნიერებათა ფაკულტეტის გეოგრაფიის დეპარტემენტის ასისტენტ პროფესორმა გიორგი დვალაშვილმა შეისწავლა გეოგრაფიის დეპარტამენტის მაგისტრებთან ერთად. ადგილს, სადაც კარსტული მღვიმე მდებარეობს ბზვანის კარსტული მასივი შესაძლოა ეწოდოს, რადგან ამ სოფელში არის, როგორც კარსტული რელიეფის რამდენიმე საინტერესო ფორმა, აგრეთვე მიწისქვეშა მდინარეები და ვერტიკალური ჩასასვლელით წარმოდგენილი კარსტული მღვიმე. ბზვანის მღვიმე გამორჩეულია სტალაქტიტებით, სტალაგმიტებით და ეგზოტიკური, ნაღვენთი ფორმებით.