ჭილის ტბა

ჭილის ტბა მცხეთა-მთიანეთის მხარეში, მცხეთის მუნიციპალიტეტში, სოფელ თელოვანში მდებარეობს, მუხათგვერდის სასაფლაოდან რამდენიმე კილომეტრში, ზღვის დონიდან 1130 მეტრზე. თუკი გრძელ ლაშქრობებში წასვლას ვერ ახერხებთ და თბილისთან ახლოს ლამაზ ადგილს ეძებთ ბუნებაში განტვირთვისთვის ჭილის ტბა ნამდვილად მოგეწონებათ. ტბა ლამაზია წლის ყველა სეზონზე, მწვანეში ჩაფლული, შემოდგომის ფერებით აფერადებული თუ ზამთრის სითეთრეში გახვეული. ჭილის ტბა ზამთარში იყინება, ისე რომ ყინულზე სეირნობაც შეგიძლიათ. ამ ადგილს თევზაობის მოყვარულებიც ხშირად სტუმრობენ. აქ შეგიძლიათ როგორც საპიკნიკედ გასეირნება, ასევე მცირე ლაშქრობის მოწყობა. გზად თბილისისა და კავკასიონის ულამაზესი ხედებითაც დატკბებით. ჭილის ტბა ზაფხულში განსაკუთრებით პოპულარულია. ტბასთან მიდის სამანქანო გზა, თუმცა მხოლოდ მაღალი გამავლობის მანქანითაა მისვლა შესაძლებელი. ასევე შეგიძლიათ მუხათგვერდის სასაფლაომდე ავტობუსს გაყვეთ, შემდეგ კი ფეხით გააგრძელოთ გზა.