დერჩის ნათლისმცემლის ეკლესია

დერჩის ნათლისმცემლის ეკლესია იმერეთის მხარეში, წყალტუბოს მუნიციპალიტეტის სოფელ დერჩში მდებარეობს. მისი აგების თარიღად XIV საუკუნე მიჩნევა. ნაგებობა ორსაფეხურიან ცოკოლზეა აღმართული. იგი დარბაზულ ნაგებობას წარმოადგენს, სამი მხრიდან მინაშენით. მთავარი ნავი აღმოსავლეთით შვერილი აფსიდით სრულდება. ცენტრალური ნავი გვერდითა ნავებს ფართე თაღებით უკავშირდება. შიდა სივრცე ოთხი სარკმელით ნათდება. ცენტრალური სივრცე და მინაშენი კამარითაა გადახურული. დასავლეთის სათავსო - ნართექსი სამივე ნავთან კარით არის დაკავშირებული. დეკორატიული გაფორმება მხოლოდ დასავლეთის სარკმელს აქვს. ფასადები სრულდება თაროსებრი ლავგარდნით. ინტერიერი მთლიანად მოხატული იყო, თუმცა დღესდღეობით ფრესკები ნაწილობრივ დაზიანებულია. აფსიდის კონქში გამოსახულია ღვთისმშობელი ყრმით ხელში, მთავარანგელოზებს შორის. მოხატულობაში ასევე გვხვდება: ზიარების კომპოზიცია, მსხვერპლის თაყვანისცემა, ამაღლების სცენა, ხარება, შობა, მირქმა, ნათლისღება, ლაზარეს აღდგინება, იერუსალიმად შესვლა, ჯვარცმა, ვედრება, სცენები იოანე ნათლისმცემლის ცხოვრებიდან, საყდარი განმზადებული, განკითხვის დღე. აქვეა წმინდანთა და ქტიტორთა გამოსახულებები. ტაძარში შემორჩენილია ფრესკული წარწერები, რომლებიც სრულად არ იკითხება. ეკლესია ნაგებია ქვიშაქვის მოყვითალო-მომწვანო თლილი კვადრებით.