დიდი კლდეისის ღვთისმშობლის ეკლესია

დიდი კლდეისის ღვთისმშობლის ეკლესია ქვემო ქართლის მხარეში, თეთრიწყაროს მუნიციპალიტეტის სოფელ დიდ კლდეისში მდებარეობს. იგი X-XI საუკუნეებით თარიღდება. ეკლესია დარბაზულ ნაგებობას წარმოადგენს, რომელსაც სამხრეთიდან და ჩრდილოეთიდან მინაშენები აქვს. ძეგლი ძალიან დაზიანებულია. სამხრეთი მინაშენი აბსიდიანი სათავსია. მის სამხრეთ კედელში დატანებული კარი მლოცველს ეკლესიის მთავარ კორპუსთან აკავშირებდა. ჩრდილოეთის მინაშენი ორნაწილიანია და მის სამხრეთ ნაწილში ამ ორი სათავსის კავშირისათვის კარია მოწყობილი. მთავარი დარბაზის კამარა მთლიანად ჩაქცეულია. შესასვლელი სამხრეთ კედლის დასავლეთ მონაკვეთშია გაჭრილი. დარბაზი როგორც ჩანს ორი სარკმლით ნათდებოდა. გრძივ კედლებს მთელ სიგრძეზე გაყოლებული აქვს ხარისხი. შესასვლელის ტიმპანი სემკულია ვაზის მტევნებით, ფოთლოვანი ორნამენტებით და განედლებული ჯვრის გამოსახულებით. ტიმპანსა და აღმოსავლეთ ფასადზე გვხვდება ასომთავრული წარწერები. ტაძრის ეზოში მიმოფანტულია მორთულობის ფრაგმენტები და რელიეფური საფლავის ქვები.