ეკის ციხე

ეკის ციხე სამეგრელოში, სენაკის მუნიციპალიტეტში, სოფელ ეკის მიდამოებში მდებარეობს, მაღალი მთის წვერზე. იგი ადრეული შუა საუკუნეებით თარიღდება. ციხე გალავნისა და ერთი კოშკისგან შედგება. გალავანს გარს უვლის ხელოვნური თხრილი. ციხე-კომპლექსის ასეთი სურათი ტიპიურია ეგრისის სამეფოში დამკვიდრებული სისტემისათვის. კოშკი დიდი ზომის ოთხკუთხა ნაგებობაა, რომლისგანაც ნაწილობრივაა შემორჩენილი სამი სართული. უკეთაა გადარჩენილი კოშკის სამხრეთ კედელი. ნაგებობის ფასადზე გამოყენებულია მქისედ დამუშავებული კირქვა, ქვების ზომები ზემოთკენ მცირდება. კოშკს დაახლოებით ათი მეტრის დაშორებით გალავანი უვლის, რომელიც ძალიან დაზიანებულია, ნაშთები უკეთ ჩანს სამხრეთ ნაწილში. თხრილი გალავნისგან 20-25 მეტრითაა დაშორებული. ამჟამად მისი სიღრმე 6-7 მეტრია, სიგანე კი - 4-5 მეტრი, თუმცა თავიდან ის უფრო ღრმა იქნებოდა.