ფხვენისის ღვთისმშობლის ეკლესია

ფხვენისის ღვთისმშობლის ეკლესია მდებარეობს შიდა ქართლში, გორის მუნიციპალიტეტის სოფელ ფხვენისის აღმოსავლეთით, დაახლოებით ნახევარი კილომეტრის მოშორებით, სასაფლაოზე. თარიღდება გვიანდელი ფეოდალური ხანით.

ღვთისმშობლის ეკლესია დგას სოფლის აღმოსავლეთით 0.5კმ-ზე, სასაფლაოზე. გეგმით დარბაზულია (8.1X5.3მ.), ნაგებია რიყის ქვით, კუთხეებში გამოყენებულია მოწითალო ფერის ნატეხი ქვა გადახურულია კრამიტით. შესასვლელი სამხრეთითაა. ნახევარწრიულ აფსიდში ერთი სარკმელია, სამხრეთ კედელში - ორი. გრძივ კედლებზე პილასტრებია, რომლებსაც ეყრდნობა ცილინდრული კამარის საბჯენი თაღი. სამხრეთ ფასადზე, კარის თავზე ჩასმულ მოწითალო ქვაზე ამოკვეთილია განედლებული ჯვარი. ასეთივე ჯვარია აღმოსავლეთ ფასადის სარკმლის თავზეც. აღმოსავლეთ სარკმელი ფასადის მხრიდან ორნამენტირებულია. დასავლეთ სარკმლის თავზე ჩასმულ მოწითალო ქვაზე X ს-ის ასომთავრული წარწერა: ,,ქრისტე, ადიდე ბეშქენ სტეფანოზის ძე". სახურავი ორფერდაა, გადახურულია ღარიანი კრამიტით.