გოდოგანის თაღოვანი ხიდი

გოდოგანის თაღოვანი ხიდი იმერეთის მხარეში, თერჯოლის მუნიციპალიტეტის სოფელ გოდოგანში მდებარეობს. იგი გვიანი შუასაუკუნეებით თარიღდება. ხიდი დღესდღეობით ფუნქციურად გამოუყენებელია. ნაგებობა მცირე ზომის, ერთმალიან თაღოვან ხიდს წარმოადგენს, რომელიც ნაწილობრივ დამუშავებული ქვის ირეგულარული და ნაწილობრივ რეგულარული წყობით არის ნაგები. ქვედა ნაწილში შედარებით დიდი ქვების ჰორიზონტალური წყობაა, რაც თანმიმდევრულად განლაგებულ მასალას შორის არის მოქცეული. თაღი საკმაოდ მაღალია და მართობულად აღმართულ კედელ-ბურჯებს ეყრდნობა, მისი საფუძველი კლდეს არის დაბჯენილი. ხიდის კიდეზე კონსტრუქციული სიმყარისათვის ლითონის ძელია ჩართული. გოდოგანის თაღოვანი ხიდი, მასთან ახლოს მდებარე კიდევ ერთ ხიდთან და სხვა საინჟინრო ნაგებობებთან ერთად ერთიან ანსამბლს ქმნის.