გომარეთის კუხის ღვთისმშობლის ეკლესია

გომარეთის კუხის ღვთისმშობლის ეკლესია მდებარეობს ქვემო ქართლის მხარეში, დმანისის მუნიციპალიტეტის სოფელ გომარეთის ცენტრში.

გომარეთის კუხის ღვთისმშობლის ეკლესია აგებულია 1014-1022 წლებში.

ღვთისმშობლის დარბაზული ეკლესია (12X7 მ) დგას შუა სოფელში. ნაგებია უხეშად გათლილი ბაზალტის ქვით. სამხრეთის ფასადზე ამოკვეთილია ასომთავრულით შესრულებული რამდენიმე წარწერა: „ქრისტე ადიდე ლიპარიტ ერისთავთ ერისთავი და შვილნი მისნი“; „სტეფანოსს და მამას და ყოველსა ერსა მათსა წმიდაო ეკლესიაო სიგრილე ყავ დიდსა მას დღესა“; „სახელითა ღმრთისათა მას ჟამსა ოდეს ძრიელმან და უძლეველმან გიორგი აფხაზთა მეფემან შეიპყრა ზვიად მარუშიანი, მაშინ ესე ბალავარი დვა ხელითა ცოდვილისა მიქელ ხუცეს-გალატოზისაითა“; „ქრისტე, სახელითა ღმრთისაითა მე კუხმან შევწირე წმიდას ამას ეკლესიასა წისქუილნი, ჟამის საწირვად დღე ხარებაი. მღუდელთ წირონ დღე ეგე“. ეკლესია თარიღდება 1014-1022 წლებით.

ეკლესია ძლიერ დაზიანებულია და სასწრაფოდ კონსერვაცია/რესტავრაციას საჭიროებს.