გუდარეხის კოშკი

გუდარეხის კოშკი ქვემო ქართლის მხარეში, თეთრიწყაროს მუნიციპალიტეტის სოფელ გუდარეხში მდებარეობს. იგი გვიანი შუასაუკუნეების ნაგებობაა და როგორც ჩანს, ალგეთის სისტემის სასიგნალო-სათვალთვალო კოშკების სისტემაში შედიოდა. კოშკი კლდის ქანზეა დასმული და მისი გეგმა კვადრატს უახლოვდება. მეორე სართულის ჩრდილოეთ კედელში გაჭრილია ტრაპეციული ფორმის კარი. პირველი სართული ყრუა, შემდეგ სართულებზე კი სათოფურებია გაჭრილი. მეხუთე სართულზე მოწყობილია მაშიკულები და გაჭრილია კარი, რომელიც ხის აივანზე გადის. სართულები ერთმანეთს კედლების სისქეში მოწყობილი კიბეებით უკავშირდება. კოშკის დასავლეთ კედელს, ძირიდან კოშკის შუა სიმაღლემდე, მოგვიანებით მიშენებული კონტრფორსი ამოუყვება. კოშკი ნაგებია ადგილობრივი ჯიშის ფლეთილი ქვით. წყობა გარკვეული მონაკვეთების შემდეგ გასწორებულია ქვის ფილებით, თარაზულობის დასაცავად. გუდარეხის კოშკი ვიზუალურად დაკავშირებულია ალგეთის ხეობის მოპირდაპირე მხარეს განლაგებულ ტბისის სამონასტრო კომპლექსთან.