ისრითის წმინდა გიორგის ეკლესია

ისრითის წმინდა გიორგის სახელობის ეკლესია იმერეთის მხარეში, ვანის მუნიციპალიტეტის სოფელ ისრითში მდებარეობს. იგი XIX საუკუნის ძეგლია. ნაგებია უხეშად დამუშავებული, სხვადასხვა ზომის ქვებით. ტაძრის კედლების გადაბმის ადგილებში გამოყენებულია, ფასადების წყობასთან შედარებით, უფრო დიდი ზომის, თლილი კვადრები. დარბაზული ნაგებობა აღმოსავლეთით ნახევარწრიული აფსიდით სრულდბა. აფსიდის ნაწილი, მთავარ დარბაზთან შედარებით, უფრო დაბალია. ტაძარს თაღოვანი სარკმლები აქვს, ერთი სარკმელი დასავლეთის ფასადში, შესასვლელის თავზეა გაჭრილი, ორ-ორი სამხრეთ და ჩრდილოეთ ფასადებში, ერთი დიდი და ორი მცირე სარკმელია აფსიდში, ერთი მცირე სარკმელი კი - აღმოსავლეთ ფასადში, აფსიდის მაღლა. ეკლესიის ინტერიერი მთლიანად შელესილია. ნაგებობას ორი სწორკუთხა, მარტივი ჩარჩოთი და სადა თაღით გაფორმებული, შესასვლელი აქვს, დასავლეთიდან და სამხრეთიდან. ეკლესიის ეზოში დგას სამსართულიანი სამრეკლო. პირველი და მეორე სართული სწორკუთხაა და სარკმლებით ნათდბა. პირელი სართული მეორე სართულთან შედარებით ბევრად განიერია და სამხრეთის მხარეს ბუხარი აქვს. მესამე, ზარებისთვის განკუთვნილი, სართული გეგმაში წრიულია და ყველა მხრიდან თაღებითაა გახსნილი, რომლებიც იატაკის დონიდან იწყება და მარტივი კაპიტელების მქონე რვა სვეტს ეყრდნობა. ამ სართულს რიკულებიანი მოაჯირი აქვს შემოვლებული. მცირე ზომის აივანი აქვს მეორე სართულს. სამრეკლოს გარედან მიდგმული აქვს ხვეული კიბე. 

როგორ მივიდეთ

ისრითის წმნინდა გიორგის სახელობის ეკლესია იმერეთის მხარეში, ვანის მუნიციპალიტეტის სოფელ ისრითში, დიხაშხოს თემში მდბარეობს, მდინარე სულორის ხეობაში. ეკლესიასთან მიდის სამანქანო გზა.