ჯაიმელას ხიდი

ჯაიმელას ხიდი (წონიარისის ხიდი) აჭარაში, ქედის მუნიციპალიტეტის სოფელ წონიარისში მდებარეობს, მდინარეზე, რომელიც მარჯვენა მხრიდან აჭარისწყალს უერთდება. ძეგლი ზუსტად დათარიღებული არ არის, თუმცა იგი განვითარებულ შუასაუკუნეებში უნდა იყოს აგებული. წონიარისის თაღოვანი ხიდი აჭარისწყლის ხეობას უმოკლესი გზით აკავშირებდა ხინოს სამონასტრო კომპლექსთან და შესაბამისად, კინტრიშის ხეობას გურიის სოფლებთან. ხიდის სიგრძე 22 მეტრია, მისი შუა ნაწილის სიგანე კი - 2.5 მეტრი. ჯაიმელას ხიდი სოფლის ერთ-ერთი უძველესი ნაგებობაა. მისი სახელწოდება ამ სოფლის უბანს - „ჯაიმელას“ უკავშირდება. ადგილობრივები მას „თამარის ხიდს“ ეძახიან. თურქთა შემოსევებისას ხიდი არაერთხელ დაზიანებულა. 2009-2010 წლებში მას სარებილიტაციო სამუშაოები ჩაუტარდა, აღდგენისას ფუძედ ძველი ხიდის ბურჯები გამოიყენეს. წონაირისის ხიდი დღემდე ფუნქციონირებს და მისი საშუალებით ადგილობრივები სოფლიდან სოფელში გადადიან. ძეგლს ეროვნული მნიშვნელობის კულტურის უძრავი ძეგლის სტატუსი აქვს.