ჯოიანის წმ. გიორგის სახელობის ეკლესია

ჯოიანის წმ. გიორგის ეკლესია მცხეთა-მთიანეთის მხარეში, მცხეთის მუნიციპალიტეტის სოფელ თელოვანში მდებარეობს, სოფლის სამხრეთ-დასავლეთით 500 მეტრზე, ფერდობზე, ხევისწყლის მარცხენა მხარეს. იგი აგებულია X საუკუნეში და განახლებულია გვიან შუა საუკუნეებში. ტაძარი შუა საუკუნეების ნასოფლარის ტერიტორიაზე დგას. ნასოფლარი დღესდღეობით ტყითაა დაფარული, შემორჩენილია ქვითკირის ნაგებობათა ნაშთები. ეკლესია დარბაზულ ნაგებობას წარმოადგენს. შესასვლელი სამხრეთიდანაა. დარბაზი აღმოსავლეთით ნახევარწრიული აფსიდით სრულდება. საკურთხეველი მთავარი დარბაზისგან ერთი საფეხურით შემაღლებული ადაბაგითა და კაპიტელებით დასრულებულ პილასტრებზე დაყრდნობილი სატრიუმფო თაღით არის გამოყოფილი. აფსიდში ერთი სარკმელია გაჭრილი, სარკმლის ორივე მხარეს კი თითო თაღოვანი ნიშია. ფასადები მოპირკეთებულია საშუალო ზომის სუფთად გათლილი ქვების რეგულარული წყობით. კარის არქიტრავის ქვაზე ტომპანის არე შეღრმავებული თაღითაა გამოყოფილი, რომელშიც წრეში ჩასმული ტოლმკლავა ჯვარია ამოკვეთილი. ჯვრის ორივე მხარეს გეომეტრიული ფორმები იკითხება. ფასადებს ორ ლილვს შორის მოქცეული წრეთარგისგან მიღებული ლავგარდანი ასრულებს. ტაძარს სამხრეთიდან ეკვდერი ჰქონია მიშენებული, რაზეც აღნიშნულ ფასადზე, არქიტრავის ქვის გასწვრივ, კედლის წყობაში შემორჩენილია ორი კონსოლი მეტყველებს. ეკლესია ნაგებია ქვიშაქვითა და კირის ხსნარით.