ხანჩალის ტბა

ხანჩალის ტბა სამცხე-ჯავახეთის მხარეში, ნინოწმინდის მუნიციპალიტეტში მდებარეობს, ზღვის დონიდან 1928 მეტრზე, ჯავახეთის ვულკანური მთიანეთის ცენტრალურ ნაწილში. ის ხანჩალის აღკვეთილის შემადგენლობაში შედის. ჯავახეთის გაშლილი სივრცეები, ალპური მდელოები და მოლივლივე ლურჯი ტბა უამრავ ტურისტს იზიდავს. ეს ერთ-ერთი შესანიშნავი ადგილია ბუნებაში განტვირთვის მოყვარულთათვის. ხანჩალის ტბას კიდევ უფრო მეტ მომხიბვლელობას მატებს ფრინველთა მრავალფეროვნება და სიმრავლე. აქ ზაფხულში უამრავი მობუდარი თუ გადამფრენი ფრინველის ნახვას შეძლებთ. პეიზაჟების ჰარმონიული ფერთა გამა და წყლის ფრინველები წარუშლელ შთაბეჭდილებას ახდენს მნახველზე. ნოემბრის ბოლოდან აპრილის ბოლომდე ტბა ყინულითაა დაფარული და თუკი ზამთრის მოგზაურობების მოყვარული ხართ, აქ ჯადოსნური, თეთრად მბრწყინავი სამყარო დაგხვდებათ. ხანჩალის ტბა ერთ-ერთი პოპულარული ადგილია ბუნებაში ხეტიალის მოყვარულთათვის.
ხანჩალის ტბა წვიმის, თოვლისა და მიწისქვეშა წყლებით იკვებება. მისი სარკის ფართობია 13,3 კმ², უდიდესი სიღრმე კი - 0,8 მ. ის ჯავახეთის მთიანეთის ტბებს შორისყველაზე დაბალი სიღრმეებით ხასიათდება. ტბის ქვაბული სინკლინური ჩადაბლების ლავური ნაკადით გადაგუბვის შედეგადაა წარმოქმნილი. ტბის აუზი საკმაოდ მჭიდრო ჰიდროგრაფიული ქსელით ხასიათდება, სამხრეთიდან და სამხრეთ-აღმოსავლეთიდან ტბას ათამდე მცირე შენაკადი უერთდება. ამჟამად ტბა დამბის მეშვეობით ორ ნაწილადაა გაყოფილი. ის თითქმის მთლიანად წყლის მცენარეებითაა დაფარული. წყალში არის მცირე რაოდენობით თევზი. ტბის ირგვლივ გაშენებულია ქალაქ ნინოწმინდის რამდენიმე უბანი და სოფლები - დიდი ხანჩალი და პატარა ხანჩალი.