ხაშმის წმ. გიორგის ეკლესია

ხაშმის წმ. გიორგის ეკლესია მდებარეობს კახეთის მხარეში, საგარეჯოს მუნიციპალიტეტის სოფელ ხაშმის ტერიტორიაზე.

ეკლესია ნაგები უნდა იყოს XVII-XVIII საუკუნეებში, ამის თქმის საფუძველს იძლევა აღმოსავლეთ ფასადზე სარკმლის ზემოთ ცენტრში განთავსებულია რელიეფური ჯვარი, რომელზეც რომბისებული წნული ორნამენტები, ჯვრები და სტილიზებული ყვავილებია ამოკვეთილი. ჯვრის მკლავები (ქვედა მკლავის გარდა) შეისრული ფორმითაა დაბოლოებული. მსგავსი ტიპის ჯვრები გვხვდება ხაშმის ნათლისმცემლის, საგარეჯოს პეტრე-პავლესა და სოფელ გეტაში მდებარე ტაძრის აღმოსავლეთ ფასადზე, რომლებიც XVII-XVIII საუკუნეებშია აგებული. ტაძარი XIX საუკუნეში გადააკეთეს და მშენებლობის დროს საფლავის ქვები გამოიყენეს. ტაძარს კომუნისტების პერიოდში იყენებდნენ საწყობად, რის დროსაც დაზიანდა ტაძრის იერსახე და ინტერიერი. ძეგლის რეაბილიტაცია მოხდა 21-ე საუკუნის დასაწყისში.