ხონის წმინდა გიორგის ეკლესია

ხონის წმინდა გიორგის ეკლესია იმერეთის მხარეში, ქალაქ ხონში მდებარეობს. იგი XI საუკუნით თარიღდება. ტაძარი სამნავიან ბაზილიკას წარმოადგენს. ნაგებობის ინტერიერში შემორჩენილია დაზიანებული ფრესკები, აღმოსავლეთის ფასადზე კი ძველი წარწერის ნაწყვეტები, რომლებიც კირითაა შეთეთრებული. შესასვლელი ორია - დასავლეთითა და სამხრეთით, ორივე მათგანი არქიტრავულია. შესასვლელები დეკორირებულია სამი ლილვისგან შედგენილ პილასტრებით, თითოეულ ლილვი რელიეფურ ბურთულას ეყრდნობა და ასეთივე ბურთულა ასრულებს. ფასადები სადაა. ტაძარს ძალიან ფართო ფანჯრები აქვს, რაც უახლოეს წარსულში გადაკეთების შედეგია. ხონის ეკლესიაში ინახებოდა წმინდა გიორგის უნიკალური ხატი, რომელზეც დატანებულია წარწერა, რომ ხატი უძლეველ მეფე გიორგის ეძღვნება, ასევე მასზე ოქროთი ამოტვიფრულია გიორგი ბრწყინვალის სახელი. ეს ხატი 1923 წელს კომუნისტების მიერ ეკლესიის დარბევის დროიდან დაკარგულად ითვლებოდა, რამდენიმე წლის წინ კი ის ქუთაისის ნიკო ბერძენიშვილის სახელობის სახელმწიფო მუზუმში აღმოაჩინეს.