ხრეითის ქვაყუნტია

ხრეითის ქვაყუნტია იმერეთში, ჭიათურის მუნიციპალიტეტში, სოფელ ხრეითში მდებარეობს, რაჭის ქედის სამხრეთ კალთაზე, ზღვის დონიდან 1285 მეტრზე. იგი მოქანავე ლოდს წარმოადგენს, რომლის წონა დაახლოებით 7-8 ტონაა. ლოდს ოთხი საყრდენი წერტილი აქვს, რომელთაგან ერთი ყოველთვის ჰაერშია, რის გამოც ის მცირედი ზეწოლითაც კი ქანაობას იწყებს და კაკუნის ხმას გამოსცემს. მსგავსი მოქანავე ლოდები მსოფლიოს სხვადასხვა ქვეყანაში გვხვდება, თუმცა მათი უმრავლესობა მაგმურ ქანებშია გამომუშავებული (გრანიტები, ანდეზიტები და სხვ.), ხრეითის ქვაყუნტია კი კირქვული ლოდია. საქართველოში კიდევ ერთი მსგავსი ბუნების ძეგლი გვხვდება, სამეგრელოში - ქუაქანცალია. ხრეითის მოქანავე ლოდი იმერეთის ერთ-ერთი საინტერესო და გამორჩეული ღირსშესანიშნაობაა.