კოდიწყაროს ტბა

კოდიწყაროს ტბა შიდა ქართლის მხარეში, ხაშურის მუნიციპალიტეტის სოფელ კოდიწყაროსთან ახლოს მდებარეობს, ზღვის დონიდან 975 მეტრზე. ტბის სიღრმე დაახლოებით 7-8 მეტრია და იკვებება გრუნტის წყლებით. ტყიანი მთებითა და ლამაზი მინდვრებით გარშემორტყმული ლურჯი ტბა ულამაზეს სანახაობას წარმოადგენს და შესანიშნავი ადგილია ბუნებისა და ხეტიალის მოყვარულთათვის. შემოდგომაზე აქ ცეცხლოვანი ფერების მშვენიერება დაგხვდებათ, გაზაფხულზე კი სიმწვანე და სიხასხასე. გაზაფხულზე კოდიწყაროს ტბით გვირილების მოყვარულები განსაკუთრებით აღფრთოვანდებიან, ტბის შემოგარენში უმშვენიერესი გვირილებიანი მინდვრებია. ეს ადგილი თევზაობის მოყვარულებსაც იზიდავს, ტბის ხედებთან ერთად შეგიძლიათ საკუთარი ნანადირევითაც დატკბეთ. კოდიწყაროს ტბა ძალიან მოხერხებულია მსუბუქი გასვლებისთვის, ულამაზესი გარემო, სიმშვიდე, სისუფთავე და სუფთა ჰაერი ნამდვილად გაამართლებს თქვენს მოლოდინს.