კუმისის ტბა

კუმისის ტბა ქვემო ქართლის მხარეში, გარდაბნის მუნიციპალიტეტში, სოფელ კუმისის სამხრეთ-აღმოსავლეთით მდებარეობს, ზღვის დონიდან 475 მეტრზე. იგი მოქცეულია იაღლუჯის მაღლობსა და წალასყურის ვაკეს შორის არსებულ ტაფობში. ტბის სარკის ზედაპირის ფართობია 5,4 კმ², მაქსიმალური სიღრმე კი - 4 მ. იგი ამჟამად წყალსაცავია. ტბა საზრდოობს წვიმის წყლითა და მცირე ნაკადულებით. დღესდღეობით მას ხელოვნური არხითა და წყალსატუმბებით მიეწოდება მდინარე მტკვრის წყალი. წყალსაცავი გამოიყენება სარწყავად. კუმისის ტბის ფსკერი სამკურნალო თვისებების მქონე ტალახითაა მოფენილი, რომელსაც აქტიურად იყენებენ თბილისის ბალნეოლოგიურ კურორტზე. მომწვანო-მოლურჯო, საკმაოდ ვრცელი ტბა და გაშლილი ხედები ძალიან ლამაზ გარემოს ქმნის. ეს ადგილი შესანიშნავია მცირე გასვლებისთვის. ტბასთან ადვილად იპოვნით საკემპინგე ადგილებსაც. კუმისის ტბის სანაპიროზე გავრცელებულია ისლი და ლელქაში, რომელსაც წყლის ფრინველები აფარებენ თავს. ტბა თევზაობის მოყვარულებსაც იზიდავს, მრავლად მოიპოვება: კეფალი, სქელშუბლა, კობრი, ლოქო, სარკისებრი კობრი, ხრამული, წვერა და სხვა. აქ ხშირად ეწყობა სამოყვარულო შეჯიბრებები სპორტულ თევზჭერაში. კუმისის ტბა ერთ-ერთი პოპულარული ადგილია ბუნებაში განტვირთვის მოყვარულთათვის.