ლაშეს ვანის ღვთისმშობლის ეკლესია

ლაშეს ვანის ღვთისმშობლის ეკლესია იმერეთში, ხარაგაულის მუნიციპალიტეტის სოფელ ლაშეში მდებარეობს, ლაშის ციხის ტერიტორიაზე. იგი XVIII საუკუნით თარიღდება. ეკლესია დარბაზულ ნაგებობას წარმოადგენს და ციხის ცენტრალურ ნაწილში დგას. შესასვლელი ორია, სამხრეთიდან და დასავლეთიდან, ორივე შესასვლელი არქიტრავულია. დარბაზი აღმოსავლეთით ფართო ნახევარწრიული აფსიდით სრულდება. აფსიდის ცენტრალურ ნაწილში მაღალი, ფართო თაღოვანი სარკმელია გაჭრილი, რომლის ორივე მხარეს თითო ნიშია განლაგებული: სამხრეთის ნიში თაღოვანია, ხოლო ჩრდილოეთისა - ოთკუთხა. ასეთივე სარკმელია დასავლეთ კედელშიც, კიდევ ერთი სწორკუთხა სარკმელი სამხრეთ კედელშია. დარბაზის კამარა კრონშტეინებზე გადაყვანილ საბჯენ თაღს ეყრდნობა. შემორჩენილია შესასვლელის არქიტრავის ქვა, რომელზეც რელიეფური ჯვარია გამოსახული, ჯვარს გვერდებზე შეზნექილი ვიწრო ლილვი შემოუყვება, ჯვრის მარჯვნივ კი წვრილი ლილვისაგან შესრულებული დეკორია. ეკლესია ნაგებია სხვადასხვა ზომის რიყის ქვით კირის დუღაბზე, კედლების კუთხეებსა სარკმლების წირთხლებზე გამოყენებულია დამუშავებული ქვა. ტაძარი დაზიანებული იყო, ჩამოქცეული იყო კამარა და მორღვეული იყო დასავლეთის შესასვლელის ღიობი. ძეგლი ამჟამად აღდგენილია.