ლაშთხვერის მთავარანგელოზის ეკლესია

ლაშთღვერის მთავარანგელოზის ეკლესია სვანეთში, მესტიის მუნიციპალიტეტის სოფელ ლაშთხვერში მდებარეობს. იგი XIV საუკუნით თარიღდება. ეკლესია დარბაზულ ნაგებობას წარმოადგენს, აღმოსავლეთით სწორკუთხედში ჩაწერილი ნახევარწრიული აფსიდით. შიდა სივრცე ერთი წყვილი პილასტრითა და მათზე გადაყვანილი თაღითაა დანაწევრებული. დარბაზი გადახურულია კამარით. ტაძარს ოთხი სარკმელი ანათებს. ფასადები სადაა, მხოლოდ სარკმლებია მორთული ლილვოვანი საპირეებით. დასავლეთ სარკმლის თავზე ჯვრის გამოსახულებაა. ტაძრის ფასადებიცა და ინტერიერიც მოხატულია. საფასადო მოხატულობა ძალიან დაზიანებულია. დასავლეთ ფასადზე გვხვდება სცენა ქართული საგმირო ეპოსიდან - “ამირანდარეჯანიანი”. რელიგიურ სცენებთან ერთად საერო სიუჟეტის გამოსახვა ლაშთხვერის მთავარანგელოზის ეკლესიას უნიკალურობას ანიჭებს. ტაძარი აღმათულია ორსაფეხურიან ცოკოლზე და ნაგებია შირიმის სუფთად თლილი კვადრებით.