მადათაფის ტბა

მადათაფის ტბა სამცხე-ჯავახეთის მხარეში, ნინოწმინდის მუნიციპალიტეტში მდებარეობს, ზღვის დონიდან 2108 მეტრზე. ის მადათაფის აღკვეთილის შემადგენლობაში შედის. ჯავახეთის ვულკანურ მთებსა და გაშლილ სივრცეებში მოქცეული ლურჯად მოელვარე ტბა ულამაზეს სანახაობას წარმოადგენს. ეს ადგილი შესანიშნავია ფრინველებზე დაკვირვების მოყვარულთათვის. ტბას ხშირად სტუმრობენ ფოტოგრაფები, რადგან აქ უამრავი მობუდარი თუ გადამფრენი ფრინველი იყრის ზაფხულობით თავს. ვრცელი ხედები, მრავალფეროვანი ფერთა გამა და ეგზოტიკური ფრინველებით ავსებული გარემო უამრავ ტურისტს იზიდავს. მადათაფის ტბისკენ მიმავალ გზაზე შეგიძლიათ სოფელი გორელოვკაც მოინახულოთ, სადაც დუხობორების ფერადი და განსხვავებული არქიტექტურით დატკბებით. ბუნებაში განტვირთვისა და მოგზაურობის მოყვარულთათვის მადათაფის ტბა ერთ-ერთი საუკეთესო ადგილია. ტბა ზამთარში სრულიად იყინება და აფერადებული გარემო ზღაპრულ, თეთრად მოელვარე სამყაროდ გარდაიქმნება.
მადათაფის ტბა წვიმის, თოვლისა და მიზისქვეშა წყლებით საზრდოობს. მისი სარკის ფართობი 8,78 კმ²-ა, უდიდესი სიღრმე კი - 1,7 მ. ქვაბული ლავის ნაკადით ხეობის გადაკეტვის შედეგადაა წარმოქმნილი. ტბიდან გაედინება მდინარე მადათაფა. წყლის ტემპერატურა ზაფხულში 17-18°C-ა. მას დაბალი ნაპირები აქვს და სანაპირო დაფარულია წყლის მოყვარული მცენარეულობით. ტბაში თევზი არ არის. მადათაფის ირგვლივ გაშენებულია სოფლები: ეფრემოვკა, ჟდანოვაკანი და სამება.