მარგიანის სახლ-მუზეუმი

მარგიანების სახლ-მუზეუმი - ძველი სვანური საცხოვრებელი კომპლექსი მესტიაში. კომპლექსის შემადგენლობაში შედის: საცხოვრებელი სახლი მთელი თავისი აღჭურვილობით, კოშკი, მარანი, სარდაფი, დილეგები და ა.შ.

ეს მუზეუმი ეკუთვნის მარგიანების ცნობილ გვარს. მათ ასევე ეკუთნოდათ 8 კოშკი, აქედან მხოლოდ 4 მათგანია შემორჩენილი. კოშკების სიმაღლე და რაოდენობა მეტყველებს გვარის სიძლიერესა და ძალაუფლებაზე.

კოშკი შედგება რამდენიმე სართულისაგან და თითოეულ სართულზე სხვადასხვა დანიშნულების ოთახებია. ერთ-ერთ ოთახში არის საკუჭნაო, სადაც მარცვლეული და სურსათ-სანოვაგე ინახებოდა სპეციალურ ყუთებში. სახლს აქვს დიდი სარდაფი, სადაც განთავსებულია მარანი. აქ ინახება არყის დოქები და ღვინის ქვევრები, თიხის ქოთნები თაფლის შესანახად.

კოშკის მისაღებ ოთახში დგას ,,სამეფო“ ტახტი, რომელზე დაჯდომის უფლებაც ოჯახის უფროსის გარდა არავის ჰქონდა. სტუმრებისთვის კი ტახტზე დაჯდომის შეთავაზება დიდ პატივად ითვლებოდა.

კოშკის მონახულების შემდეგ შეგიძლიათ ახვიდეთ სახურავზე, საიდანაც ხედები იშლება მესტიაზე.