მაცხვარიშის მთავარანგელოზთა ეკლესია

მაცხვარიშის მთავარანგელოზთა ეკლესია სვანეთში, მესტიის მუნიციპალიტეტის სოფელ მაცხვარიშში მდებარეობს. იგი XIII-XIV საუკუნეებით თარიღდება. ეკლესია დარბაზულ ნაგებობას წარმოადგენს, აღმოსავლეთით შვერილი აფსიდით და სამხრეთის მინაშენით. შიდა სივრცე წყვილი პილასტრით ორ ნაწილად იყოფა. დარბაზი გადახურულია კამარით. საკურთხეველი ძირითადი სივრცისგან ტაძრის თანადროული მოხატული კანკელითაა გამოყოფილი. ინტერიერი მთლიანად მოხატულია. ეკლესიას სამი სარკმლით ნათდება, თითო სარკმელი გაჭრილია საკუთხეველში, დასავლეთ კედელსა და სამხრეთი კედლის აღმოსავლეთ მონაკვეთში. სარკმლებს სამი ლილვისგან შედგენილი მოჩარჩოება აქვს. შესასვლელი ორია, სამხრეთიდან და დასავლეთიდან, ორივე მათგანი გარედან სწორკუთხაა, შიგნიდან კი - თაღოვანი. დასავლეთის შესასვლელის თავზე რელიეფური ჯვარია გამოსახული. აფსიდი დეკორირებულია ლილვოვან პილასტრებზე გადაყვანილი თაღედით. ფასადებს ლილვისა და წრეთარგისგან შექმნილი ლავგარდანი ასრულებს. ეკლესია ნაგებია მონაცრისფრო შირიმის, სუფთად თლილი კვადრებით.