მჭიშთას ვოკლუზი

მჭიშთას ვოკლუზი აფხაზეთში, გუდაუთის მუნიციპალიტეტში მდებარეობს. იგი ერთ-ერთი ყველაზე დიდი მიწისქვეშა მდინარეა, იგი მღვიმედან გამოედინება. მღვიმის დერეფანს ბოლოში საკმაოდ ღრმა და მოზრდილი ტბა ახშობს. როგორც ჩანს, აქ იყრის თავს მჭიშთას ჩრდილოეთით მდებარე კარსტულ უფსკრულებში გამდინარე ნაკადები. მჭიშთას სიფონური დერეფნების მხოლოდ უკიდურესი დასავლეთ უბნის დაზვერვა მოხერხდა. მისი ძირითადი აღმოსავლური განშტოების გამოკვლევა ჯერჯერობით შეუძლებელია, რადგან მიწისქვეშა დერეფნებში წყლისაგან თავისუფალი საივრცეები სხვადასხვა ფორმის მოზრდილი ნაღვენთი წარმონაქმნებით არის ამოვსებული. მჭიშთას მიწისქვეშა მდინარე საკმაოდ ვრცელი ტერიტორიიდან იკრებს წყალს, თითქმის მთელი ბზიფის მასივის მიწისქვეშა წყლები მჭიშთას აუზში იყრის თავს. მჭიშთა და თოვლიანი ერთი და იგივე ჰიდროგეოლოგიურ სისტემას წარმოადგენს, ეს სისტემა “თოვლიანის” ჩასასვლელი შახტით მთავრდება.