მიწის ხიდი

მიწის ხიდი აჭარაში, ქედის მუნიციპალიტეტის სოფელ პირველი მაისის მიდამოებში მდებარეობს, აგარისწყლის მარჯვენა შენაკადზე, მდინარე ჭანჭახეთზე, ვიწრო და კლდოვან ადგილზე. იგი XI-XIII საუკუნეებით თარიღდება. ხიდის სიგრძე ბურჯიდან ბურჯამდე 7 მეტრია, სავალი ზედაპირის სიგრძე - 16 მეტრი. სიგანე კი - 1,9-2 მეტრი. მას გაშლილი ნახევარწრიული თაღის მოხაზულობა აქვს და ორივე ნაპირზე კლდოვან ქანზე დაშენებულ ბურჯებს ეყრდნობა. ხიდი ნაგებია ნახევრადდამუშავებული ქვით კირის დუღაბზე, ქვები სწორ რიგზეა დალაგებული. ზედაპირზე ქვის ფილებთა დაფენილი. თაღები ერთი ცენტრის ირგვლივ დალაგებული, კარგად გათლილი კვადრებითაა გადაყვანილი. ნახევარწრიული თაღი მცირე შვერილითაა მოჩარჩოებული. სავალი ნაწილის შუაში ხიდი ტეხილს იკეთებს, რაც მას მეტ მხატვრულობას სძენს. მიწის ხიდის სამშენებლო ტექნიკა სხვა ხიდებისაგან განსხვევაბით უფრო დახვეწილია. ამ თვალსაზრისით მასთან ახლოს დგას მახოს ხიდი. ხიდზე კირის ხსნარი ნიაღვრისეული მიწით არის დაფარული და ისეთ შთაბეჭდილებას ტოვებს თითქოს ტალახით იყოს ნაგები, როგორც ჩანს, მისი სახელწოდებაც აქედან წარმომდგარა.