მთაწმინდის პანთეონი

მთაწმინდის პანთეონი ქალაქ თბილისში, მთაწმინდის ფერდობზე, მამა დავითის ეკლესიის შემოგარენში მდებარეობს. ის გახლავთ გამოჩენილ მწერალთა, საზოგადო მოღვაწეთა, მეცნიერთა და ხელოვანთა დასაკრძალავი ადგილი. მთაწმინდის პანთეონის დაარსების იდეა აკაკი წერეთლის დაკრძალვის დღეებში გაჩნდა, 1915 წელს და ეს იდეა 14 წლის შემდეგ განხორციელდა, 1929 წელს. პანთეონი ალექსანდრე გრიბოედოვის გარდაცვალების მე-100 წლისთავზე გაიხსნა, რომელიც მთაწმინდაზეა დასაფლავებული. აქ განისვენებენ ჩვენი ქვეყნის ისეთი დიდებული მოღვაწეები, როგორიც არიან: ილია ჭავჭავაძე, ექვთიმე თაყაიშვილი, ქაქუცა ჩოლოყაშვილი, ვაჟა-ფშაველა, გალაკტიონ ტაბიძე, ნიკოლოზ ბარათაშვილი, იაკობ ნიკოლაძე და სხვა. მთაწმინის პანთეონში დაკრძალვა წარმოადგენს პატივის მიგებისა და მადლიერების გამოხატვის ფორმას სახელმწიფოს მხრიდან, განსაკუთრებული ღვაწლის მქონე ადამიანების მიმართ. გარდა მემორიალური დანიშნულებისა, მთაწმინდიდან თბილისის შესანიშნავი ხედი იშლება. აქვე მოინახულებთ ქალაქის ერთ-ერთ ღირსშესანიშნაობას - მთაწმინდის მამა დავითის ტაძარს.