ნასოფლარ ხოირეთის ეკლესია

ნასოფლარ ხოირეთის ეკლესია მდებარეობს თრიალეთში, წალკის მუნიცილიტეტის ტერიტორიაზე. ავრანლოდან სოფ. რეხასაკენ მიმავალი გზის მარჯვენა მხარეს, გზიდან 1,5 კმ დაცილებით მდებარეობს ნასოფლარი ხოირეთი. ნასოფლარი ძლიერაა დანგრეული, სახლები დაფარულია მიწით, თუმცა ნაგებობათა ნაშთების კონტურები კარგად შეინიშნება.

ნასოფლარის აღმოსავლეთ კიდეზე, ხევის პირას დგას მთავარანგელოზის დარბაზული ეკლესია, რომელიც XIX-XX სს-ში არაერთხელაა გადაკეთებული ადგილობრივი მოსახლეობის მიერ. ეკლესია აგებულია დიდი ზომის ქვებით. შესასვლელი სამხრეთიდან აქვს. აღმოსავლეთის ფასადზე, სარკმლის ზემოთ ჩასმულია ქვა ასომთავრული წარწერით, რომელშიც მოიხსენიება ბაგრატ IV ნოველისიმოსი. ეკლესია შემოზღუდულია ქვის დაბალი გალავნით. ეზოში გამართულია სასაფლაო. საფლავის ქვებზე გვხვდება რელიეფური გამოსახულებები.

ეკლესია რესტავრირებულია მამა დოროთეს მონდომებით,რომელიც ბერთაში მსახურობდა 2003 წლიდან 2012 წლამდე.