ნატკორის ეკლესია

ნატკორის ეკლესია მდებარეობს კახეთის მხარეში, თელავის მუცინიპალიტეტის სოფელ გულგულას მიმდებარედ ნასოფლარ ნატკორის ტერიტორიაზე. თარიღდება VI საუკუნით.

ძეგლი სამნავიანი ბაზილიკაა (22x11 მ). აგებული იყო რიყის ქვის სწორხაზოვანი რიგებით, გარეთა კუთხეები, ნავების გამმიჯნავი ბოძები და თაღები - შირიმით. ნაგებობის გეგმის სწორკუთხედში ჩაწერილია საკმაოდ ვრცელი, შუა ნავი და ვიწრო, გვერდის ნავები, რომლებიც ერთმანეთისგან გეგმით ჯვრული ფორმის ბოძების სამი წყვილით იყო გამიჯნული.

ეკლესია არაერთხელ ყოფილა დაზიანებული (როგორც ჩანს, მიწისძვრებით) და განახლებული. X-XI საუკუნეებში, პირველი ნგრევის შემდგომ, ნავების გამმიჯნავი ბოძების დასავლეთი წყვილის ხაზზე, ბაზილიკის მთელ სიგანეზე, აუგიათ ყრუ კედელი, რომელშიც ნავების გამმიჯნავი, ორივე ბოძი იყო ჩართული. (ერთ-ერთი ბოძი მთელ სიმაღლეზეა შემორჩენილი). შუა ნავის ფარგლებში, ამ კედლის ზედა ნაწილში, მოწყობილია მცირე ზომის სარკმელი. მომდევნო ხანებში (სავარაუდოდ, XIV საუკუნეში), ასეთივე კედელი, მაგრამ პირველზე ბევრად დაბალი, ჩააშენეს ბოძების შუა წყვილს შორისაც. ამავე დროს, შუა ნავის სამხრეთ თაღებიდან , აღმოსავლეთიდან პირველ და მეორე, ხოლო ჩრდილოეთ თაღებიდან - აღმოსავლეთიდან მეორე - მთლიანად ამოუშენებიათ და შუა ნავის აღმოსავლეთ ნაწილში მცირე სამლოცველო მოუწყვიათ, რომელშიც შესვლა მხოლოდ ბაზილიკის ჩრდილოეთ ნავიდან, აღმოსავლეთით მდებარე თაღიდან იყო შესაძლებელი.