ნუნისის ღვთისმშობლის ეკლესია

ნუნისის ღვთისმშობლის ეკლესია იმერეთის მხარეში, ხარაგაულის მუნიციპალიტეტის სოფელ ნუნისში მდებარეობს. იგი IX-X საუკუნეებით თარიღდება. ნაგებობა მრავალჯერ დანგრეულა და განუახლებიათ. უკანასკნელად ტაძარი ომარ-ხანმა დაანგრია და დაწვა, 1785 წელს, ვახანის ციხის აღების შემდეგ და XIX საუკუნემდე აღარ აღუდგენიათ. ნუნისის ღვთისმშობლის ეკლესია სამნავიან ბაზილიკას წარმოადგენს. ცენტრალური ნავი გვერდითა ნავებისგან სამ-სამი თაღითაა გამოყოფილი. თაღები მასიურ სვეტებს ეყრდნობა. ეკლესიას ორი შესასვლელი აქვს, სამხრეთითა და დასავლეთით, ორივე მათგანი არქიტრავულია, არქიტრავების თავზე კი ღია თაღებია გაჭრილი. ნაგებობას თაღოვანი სარკმლები აქვს, რომლებშიც დღესდღეობით ხის ჩარჩოები და მინებია ჩასმული. ტაძარი ნაგებია სხვადასხვა ზომის კლდისა და შირიმის ქვით კირის დუღაბზე. ამჟამად ეკლესიის ინტერიერი მთლიანად შელესილია. ეზოში გვხვდება ქვის ნატეხი ასომთავრული წარწერის ფრაგმეტით. ტაძარს ირგვლივ კლდისა და რიყის ქვისაგან ნაშენი გალავანი შემოუყვება.