პომპეუსის (ბამბუას) ხიდი

პომპეუსის (ბამბუას) ხიდი იმერეთის მხარეში, ხონის მუნიციპალიტეტის სოფელ ხიდში მდებარეობს. იგი შუასაუკუნეების ნაგებობაა, თუმცა მეცნიერთა ვარაუდით აქ ანტიკურ პერიოდშიც უნდა ყოფილიყო ხიდი, რადგან ამ ადგილას გადიოდა ციხეგოჯიდან ჩრდილოეთისა და აღმოსავლეთისკენ მიმავალი უძველესი გზა. გადმოცემის თანახმად ბამბუას ხიდი გნეუს პომპეუსს აუგია, როცა აქ გაუვლია ქართლის მეფე არტაგთან გამარჯვების შემდეგ. პომპეუსის ხიდი ქვის ბურჯებზე დაყრდნობილ ხის, ასაწევ კონსტრუქციას წარმოადგენდა. დღესდღეობით შემორჩენილია მხოლოდ ბურჯები. სოფელ ხიდში ასევე მდებარეობს შუასაუკუნეების ობუჯის ნაეკლესიარი.