რგანის წმინდა გიორგის ეკლესია

რგანის წმინდა გიორგის ეკლესია იმერეთის მხარეში, ჭიათურის მუნიციპალიტეტის სოფელ რგანში მდებარეობს. იგი X საუკუნით თარიღდება. ეკლესია დარბაზულ ნაგებობას წარმოადგენს, რომელიც აღმოსავლეთით სწორკუთხედში ჩაწერილი ნახევარწრიული აფსიდით სრულდება. ტაძარს მინაშენები ჰქონია, რომლებიც ამჟამად საძირკვლის დონეზეა შემორჩენილი. ნაგებობას სამი სწორკუთხა შესასვლელი აქვს - დასავლეთით, სამხრეთითა და ჩრდილოეთით. სამხრეთის შესასვლელის თავზე სიბრტყის შეწევით მიღებული თაღი და რელიეფური ჯვარია. დარბაზის კამარა პილასტრებზე გადაყვანილ თაღებს ეყრდნობა. ინტერიერი მთლიანად შელესილია. ეკლესიას თაღოვანი სარკმლები აქვს. ფასადები სადაა. სამხრეთის ფასადზე გვხვდება საკმაოდ ვრცელი ასომთავრული წარწერა. ნაგებობა მაღალი პროპორციებით ხასიათდება. ეკლესია ნაგებია კარგად თლილი შირიმით.