საჩინის გუმბათიანი ტაძარი

საჩინის მონასტერი კახეთში, ახმეტის მუნიციპალიტეტის სოფელ ახალდაბაში მდებარეობს. იგი XIV საუკუნით თარიღდება. ეკლესია ჩახაზული ჯვრის ტიპის გუმბათოვანი ნაგებობაა, რომელიც გეგმაში კვადრატულია. ტაძარი დაზიანებულია: გუმბათიდან შემორჩენილია ერთი სარკმელი და ორი მომიჯნავე სარკმლის თითო წირთხლი, შესასვლელი სამია - სამხრეთიდან, დასავლეთიდან და ჩრდილოეთიდან. საკურთხეველი ერთი საფეხურითაა შემაღლებული და გამოყოფილი ყოფილა შირიმის კანკელით, რომლისგანაც ფრაგმენტებია შემორჩენილი.

აღნიშნული ტაძარი საჩინოთაც იწოდება, ის მონღოლებისგან გათავისუფლების შემდგომ აგებული ერთ-ერთი პირველი ტაძარია, თან ისეთ მხარეში სადაც მონღოლთა ბატონობა ძლიერი იყო.

ტაძარს აღმოსავლეთის გარე ფასადზე აქვს წარწერა სადაც იხსენიება მისი ქტიტორი ზურაბ საგინისძე "ღმერთო და ყოვლად წმიდაო ღვთის მშობელო,მეოხ ეყავ წინაშე ღვთისა ზურაბს საგინის ძ(ესა)"