სამშვილდის კანიონი

სამშვილდის კანიონი ქვემო ქართლის მხარეში, თეთრიწყაროს მუნიციპალიტეტში მდებარეობს, სამშვილდის ნაქალაქარის მიმდებარედ. ბუნების ძეგლი მდ. ხრამის შუა წელში, ლავურ ქანებში გამომუშავებულ ღრმა, კანიონისებრი ხეობისა და მდ. ჭივჭავის კანიონის ერთობლიობას წარმოადგენს. კანიონის ჩაჭრის სიღრმე საშუალოდ 300 მეტრია. გაშლილ სივრცეში გაწოლილი ხეობები ულამაზეს სანახაობას ქმნის. კანიონზე შესანიშნავი ხედები იშლება სამშვილდის ნაქალაქარის ტერიტორიიდან. სხვადასხვა პერიოდის ისტორიული ძეგლებისა და ულამაზესი ბუნების ერთობლიობა უამრავ მნახველს იზიდავს და უდიდეს შთაბეჭდილებას ახდენს. ეს ადგილი საინტერესოა, როგორც ბუნების მოყვარულთათვის, ასევე ისტორიულ-კულტურული ძეგლებით დაინტერესებული ადამიანებისთვის. სამშვილდის კანიონი გაშიშვლებული კვარცპორფირის ინტრუზივით იწყება, რომელსაც გამოფიტვის შედეგად მაგმური კვარცის ლამაზი, თანაბრად დაკუთხული, ბიპირამიდული ფორმის კრისტალები სცვივა. სამშვილდის კანიონი 5-6 კილომეტრის სიგრძის მდ. ხრამის კანიონსა და 3-4 კილომეტრის სიგრძის მდ. ჭივჭავის კანიონს მოიცავს.

როგორ მივიდეთ

სამშვილდის კანიონთან მოხვედრა ძალიან მარტივია. სოფელ სამშვილდეში მიდის სამანქანო გზა. სოფლიდან კი სამშვილდის კანიონის ბუნების ძეგლი დაახლოებით 1 კმ-ითაა დაშორებული.