სასირეთის წმინდა გიორგის ეკლესია

სასირეთის წმინდა გიორგის სახელობის ეკლესია შიდა ქართლისმხარეში, კასპის მუციპალიტეტის სოფელ სასირეთში მდებარეობს, სოფლის განაპირას, სასაფლაოზე. იგი XIX საუკუნით თარიღდება და დარბაზული ტიპის ნაგებობას წარმოადგენს. ნაგებია კლდისა და რიყის ქვით. გეგმაში სწორკუთხა ეკლესია აღმოსავლეთით ნახევარწრიული აფსიდით სრულდება, რომლის ცენტრშიც თაღოვანი სარკმელია. აფსიდის სამხრეთით და ჩრდილოეთით თითო სწორკუთხა ნიშაა განთავსებული. კონქი და კამარა ხისაა. აფსიდის იატაკი დარბაზთან შედარებით ერთი საფეხურითაა ამაღლებული და ხის კანკელით არის გამოყოფილი. მეორე სართულის დონეზე საგალობელია მოწყობილი ხის კიბითა და ხისავე, რიკულებიანი მოაჯირით. ტაძარს ორი შესასვლელი აქვს, სამხრეთიდან და დასავლეთიდან. სამხრეთ სესასვლელის ორივე მხარეს თითო თაღოვანი სარკმელია. ერთი თაღოვანი სარკმელია გაჭრილი ჩრდილოეთ კედლის აღმოსავლეთ ნაწილშიც. ინტერიერი მთლიანად შეღებილია. სამხრეთის შესასვლელისთვის უახლოეს წარსულში მიუშენებიათ აგურის სტოა. ასევე მოგვიანებითაა აგებული ნატეხი ქვითა და აგურით ნაშენი სამრეკლო.

როგორ მივიდეთ

სოფელი სასირეთი შიდა ქართლის მხარეში, კასპის მუნიციპალიტეტში, თელიანის თემში მდებარეობს, კასპიდან 18 კმ-ის დაშორებით. სოფელში მიდის მოასფალტებული სამანქანო გზა.