შინდისის იოანე ნათლისმცემლის ეკლესია

შინდისის იოანე ნათლისმცემლის ეკლესია მდებარეობს შიდა ქართლის მხარეში, გორის მუნიციპალიტეტის სოფელ შინდისის ჩრდილოეთით 1კმ-ზე.

ეკლესია დარბაზულია (10.5X6მ.). ის აგებულია X-XI საუკუნეებში. ნაგებია რიყის ქვით, სვეტებზე, თაღებზე, სამხრეთის კარის წირთხლზე და აღმოსავლეთ ფასადის სარკმელზე გამოყენებულია თლილი მოწითალო ქვა. ეკლესიას შესასვლელები სამხრეთით, დასავლეთითა და ჩრდილოეთით აქვს. ნახევარწრიულ აფსიდში ერთი სარკმელი და სამი ნიშია. ნიშებს ქვის თაღები აქვს. სამხრეთ კედელში ორი სარკმელია, დასავლეთისაში - ერთი. ჩრდილოეთ კედელში, იატაკიდან 1.5მ. სიმაღლეზე, პატარა სარკმელი და კარია, რომელიც ჩრდილოეთ მინაშენში გადის. დარბაზის გრძივ კედლებზე ორსაფეხურიანი პილასტრებია, რომლებსაც ეყრდნობა ცილინდრული კამარის საბჯენი თაღები. ეკლესიის კამარა ალაგ-ალაგ ჩანგრეულია. კამარის საბჯენი თაღი თლილი კვადრებითაა გადაყვანილი. ჩრდილოეთის მინაშენი ეკლესიას მთელ სიგრძეზე გასდევს. აღმოსავლეთ ფასადის სარკმელს თავსართი ამშვენებს.