სიძერძალის ტბა

სიძერძალის ტბა აჭარაში, ქობულეთის მუნიციპალიტეტში მდებარეობს, კინტრიშის სახელმწიფო ნაკრძალის განაპირას, ზღვის დონიდან დაახლოებით 2200 მეტრზე. ტბა გარშემორტყმულია მინდვრებითა და ბუჩქოვანი მცენარეებით. ეს ერთ-ერთი შესანიშნავი ადგილია ლაშქრობისა და ველური ბუნების მოყვარულთათვის. მოლივლივე ლურჯი ტბა და მთების ულამაზესი ხედები საოცარ სანახაობას ქმნის. ნაკრძალის ტერიტორიაზე მრავალ ენდემურ და რელიქტურ ფლორისა თუ ფაუნის წარმომადგენელს იხილავთ, აქ გვხვდება: ჰარტვისის მუხა, შავი მურყანი, რცხილა, უთხოვარი, ბზა, პონტოს მუხა, მედვედევის არყი, ძახველი, ხეშავი და ა.შ, ცხოველებიდან კი - შველი, არჩვი, დათვი, მელა, კვერნა, ტყის კატა, დედოფალა და სხვა. ტყეები, ალპური მდელოები, კამკამა ტბა და პანორამული ხედები შესანიშნავ გარემოს ქმნის დაუვიწყარი, თავგადასავლებით სავსე მოგზაურობისთვის.