სიღნაღის წმ. გიორგის ეკლესია

სიღნაღის წმინდა გიორგის ეკლესია კახეთში, ქალაქ სიღნაღში მდებარეობს. იგი XIX საუკუნით თარიღდება. ეკლესია დარბაზული ტიპის ნაგებობას წარმოადგენს, თუმცა მისი გარე მასები ისეა დანაწევრებული, რომ სამნავიანი ეკლესიის შთაბეჭდილებას ტოვებს. საკურთხევლის აფსიდი ძირითად სივრცეზე უფრო ვიწროა, მის გვერდით კი პასტოფორიუმებია მოწყობილი. დარბაზი ნახევარცილინდრული კამარა პილასტრებზე გადაყვანილ ორ საბჯენ თაღს ეყრდნობა. ტაძრის დანაწევრებულია თაღებით, რომლებშიც სარკმლებია გაჭრილი. შესასვლელი სამია - დასავლეთიდან, სამხრეთიდან და ჩრდილოეთიდან. ეკლესია საკმაოდ დახვეწილი პროპორციებით გამოირჩევა. აღმოსავლეთ და დასავლეთ ფასადები ფრონტონებით სრულდება, რომელშიც ორ-ორი თაღოვანი ჩაღრმავებაა, კეხში კი ჯვრის რელიეფური გამოსახულება. შუა ნავის გრძივი ფასადები ბრტყელი თაღებითაა დანაწევრებული. ცენტრალური ნავის თავზე პატარა, თაღებით გახსნილი ფანჩატურია აღმართული. ტაძარი ნაწილობრივ ძველი გალავნითაა მოფარგლული, რომლის კოშკშიც სამრეკლოა მოწყობილი. მრგვალ კოშკს თაღოვანი ფანჩატური აქვს დაშენებული. ეკლესია ნაგებია რიყის ქვითა და აგურით.