სვიფის წმ. გიორგის ტაძარი

სვიფის წმ. გიორგის ტაძარი სვანეთში, მესტიის მუნიციპალიტეტის სოფელ სვიფში მდებარეობს. იგი X საუკუნით თარიღდება. ეკლესია დარბაზულ ნაგებობას წარმოადგენს, აღმოსავლეთით სწორკუთხედში მოქცეული აფსიდით. აფსიდი მხრებთან ნალისებრია, შემდეგ შებრტყელებულ, ელიფსურ ფორმას იღებს. საკურთხეველი ერთი საფეხურითაა ამაღლებული. ინტერიერი მთლიანად მოხატულია. საკურთხეველი დარბაზისგან სამთაღოვანი კანკელით გამოიყოფა. კანკელიც მოხატულია. ტაძარი აღმოსავლეთისა და სამხრეთის თაღოვანი სარკმლებით ნათდება. შესასვლელი ერთია - დასავლეთიდან, იგი გარედა სწორკუთხაა, შიგნიდან კი - თაღოვანი. ყურადღებას იქცევს ეკლესიის ხის კარი, რომელიც ქართული, ხეზე კვეთის ერთ-ერთი შესანიშნავი ძეგლია. კარზე XI საუკუნის ასომთავრული წარწერაა: "წმიდაო გიორგი, მეოხ ეყავ წინაშე ღმრთისა სულისა გაბისსოისა, ამენ". მოხატული ყოფილა ტაძრის ფასადებიც, თუმცა დღესდღეობით საფასადო მოხატულობის მცირე ფრაგმენტებია შემორჩენილი.