თეთრიწყაროს წმინდა ნიკოლოზის ეკლესია

თეთრიწყაროს წმინდა ნიკოლოზის ეკლესია ქვემო ქართლის მხარეში, ქალაქ თეთრიწყაროში მდებარეობს. იგი XIX საუკუნის ძეგლია, რომელიც რუს კოლონიზატორებს აუგიათ. ტაძარი ჯვარგუმბათოვან ნაგებობას წარმოადგენს. რვაწახნაგა გუმბათი ჯვრის მკლავების კედლების გადაკვეთის კუთხეებს ეყრდნობა. ეკლესიას დასავლეთიდან სწორკუთხა შესასვლელი აქვს, რომელიც პილასტრებზე გადაყვანილი თაღითაა მოჩარჩოებული. კარის ტიმპანი ხისაა და მოჩუქურთბებულია. ნაგებობის ყველა სარკმელი, გარდა დასავლეთისა, თაღოვანია. აღმოსავლეთის ფასადი გამაგრებულია კონტრფორსებით. გუმბათი თუნუქის პერანგითაა შემოსილი. ეკლესია ნაგებია ბაზალტის კვადრებით. გუმბათოვანი ტაძრის გვერდით უფრო ადრეული წმ. გიორგის სახელობის დარბაზული ეკლესიაა, რომელიც ქვის სუბსტრუქციაზე დგას. ნაგებობას სამხრეთიდან სწორკუთხა შესასვლელი აქვს. არქიტრავზე ხუთი რელიეფური ჯვარია გამოკვეთილი. არქიტრავის თავზე სხვადასხვა ფერის ქვისგან მარაოსებრად აწყობილი თაღია, რომელშიც წმ. გიორგის რელიეფია ჩასმული. ეკლესიას სამი ვიწრო, თაღოვანი სარკმელი აქვს - აღმოსავლეთით, დასავლეთითა და სამხრეთით. ფასადებს სადა, თაროსა და წრეთარგისგან შედგენილი ლავგარდანი ასრულებს.