ტონთიოს ხუთმალიანი ხიდი

ტონთიოს ხუთმალიანი ხიდი სამცხე-ჯავახეთის მხარეში, ნინოწმინდის მუნიციპალიტეტის სოფელ ყაურმაში მდებარეობს (ისტორიული სოფელი ტონთიო). ნაგებობა XIII-XIV საუკუნეებით თარიღდება. ტონთიოს ხიდი ხუთმალიანია და იგი შუა სოფელში ჩამომდინარე ფარავნის წყალზეა გადებული. მასზე გადიოდა ბიზანტიიდან, შემდგომ კი თურქეთიდან და სომხეთიდან აღმოსავლეთ საქართველოში მომავალი ერთ-ერთი ცენტრალური გზა. 1893 წლამდე ხიდის თავში ძველი ქართული წარწერა ყოფილა დაცული. ხიდის სიგრძე 72,2 მეტრია, სიგანე კი - 4,5 მეტრი. ნაგებობას წინა მხრიდან წყალამრიდები აქვს ბურჯებზე მიშენებული, რომლებიც ხიდს იცავენ მოდიდებული წყლის ტალღებისა და მუდმივი ნაკადისაგან.სოფელ ყაურმაში ასევე შეგიძლიათ მოინახულოთ XI საუკუნის ეკლესია.