ტყვირის მაცხოვრის სახელობის ეკლესია

ტყვირის მაცხოვრის სახელობის ეკლესია სამეგრელოში, აბაშის მუნიციპალიტეტის სოფელ ტყვირში მდებარეობს. იგი XVI საუკუნით თარიღდება. ეკლესია თავისუფალი ჯვრის ტიპის გუმბათოვან ნაგებობას წარმოადგენს. ჯვრის მკლავები ძალიან მოკლეა, მცირედ შვერილი. ტაძარს ჩრდილოეთით და დასავლეთით მიდგმული აქვს ეკვდრები. ფასადებზე ჩართულია კირქვის ფართო ფილები ორნამენტული მოდილიონებით და კარ-ფანჯრის არშიები. დასავლეთის კარის თავზე მოჩუქურთმებული ჯვრის რელიეფია, რომლის ირგვლივ შესრულებულია მხედრული წარწერა. წარწერა ექვთიმე თაყაიშვილი შემდეგნაირად კითხულობს: „სახელითა ღმრთიასითა აღეშენა. მაცხოვრისა მტყუვრისა საყდრისა აღმაშენებელსა ქუველსა ჭილაძესა შუნდვენ ღმერთმან. ძმათა მისთა კახაბერსა და ჩუბინსა შეუნდვეს ღმერთმან. ვინც შენდობა ბრძანოთ, შეგინდვნეს ღმერთმან“. ფასადთა ბევრ ქვაზეა ამოკვეთილი ნუსხური და მხედრული წარწერები. ფასადები შეულესავთ და ტაძარს პირვანდელი სახე დაკარგული აქვს, ნალესობა ნაწილობრივაა შემორჩენილი, გუმბათი შეთეთრებულია.