წალკის იოანე ნათლისმცემლის ეკლესია

წალკის წმ. იოანე ნათლისმცემლის ეკლესია მდებარეობს ქვემო ქართლში, ქალაქ წალკის ტერიტორიაზე სტალინის ქ. #73-ში, ბ. ნიკოლოვის საკარმიდამო ნაკვეთში.

დაზიანებული დარბაზული ეკლესია ნაგებია თლილი ქვით. აღმოსავლეთით აქვს ნახევარწრიული აფსიდი, სატრიუმფო თაღი ნალისებური ფორმისაა. საკურთხეველში ერთი სარკმელია გაჭრილი, რომლის ორივე მხარეს ტრაპეციის ფორმის ნიშებია. სარკმელთან ტრაპეზის ქვა დევს. მასზე ჯვარია ამოკვეთილი. ეკლესიას შესასვლელი სამხრეთიდან აქვს, იგი გარედან არქიტრავულია, შიგნიდან კი თაღოვანი. დეკორი სადაა – ჭარბობს თაროებისა და ლილვების მოტივი.

ინტერიერში შემორჩენილია ფრესკების ნაშთები.

ეკლესიას დიდი ზომის დაუმუშავებელი ქვებით, მშრალი წყობით ნაგები გალავანი ჰქონდა შემოვლებული, რომლის მხოლოდ სამხრეთი ნაწილია შემორჩენილი.

ეზოში რამდენიმე საფლავის ქვაა. ეკლესიის სამხრეთით დგას ცხენის, ხოლო აღმოსავლეთით ცხვრის ქანდაკებები, სამხრეთ-დასავლეთით გალავანთან დევს ქვის ემბაზი.

ამჟამად ეკლესია რესტავრირებულია.