წოფის მთავარი ეკლესია

წოფის მთავარი ეკლესია მდებარეობს ქვემო ქართლის მხარეში, მარნეულის მუნიციპალიტეტის სოფ. წოფის განაპირას.

წოფის ეკლესია აგებულია VI საუკუნეში.

ეკლესია სამსაფეხურებიან სტილობატზე მდგარი დარბაზული ნაგებობაა (14,7x9,7მ.), რომელსაც სამხრეთიდან, დასავლეთიდან და ჩრდილოეთიდან მინაშენები აქვს მიდგმული. სამი საფეხურით შემაღლებული ნალისებური აფსიდი ხუთ წახნაგადაა შვერილი. ტაძარის სქელი კედლები ერთი ზომის, სწორკუთხა ფორმის მოგრძო, უხეშად დამუშავებული კირქვითაა ნაგები, ხოლო კონსტრუქციები კარგად გათლილი მუქი ფერის ტუფითაა გამოყვანილი. ორი განიერი კარი დასავლეთ და სამხრეთ კელდებშია გაჭრილი, რომელთაც მასიური, დიდი ზომის არქიტრავები ხურავთ. ორი წყვილი, ძლიერ გამოწეული მსხვილი პილასტრებით ინტერიერი სამ ტოლ მონაკვეთადაა დაყოფილი. სამხრეთ და დასავლეთ მინაშენების მხოლოდ კონტურები იკითხება; სამხრეთ მინაშენს ნახევარწრიული აფსიდი ჰქონია. შედარებით უკეთაა შემორჩენილი ჩრდილოეთ მინაშენი, კონქით, ნახევარწრიული აფსიდით და ტრაპეზის ქვით; ჩრდილოეთ მინაშენის კედლებიდან სამი _ აღმოსავლეთ, დასავლთ და ჩრდილოეთ კედლები შემორჩა. დარბაზი ორ არათანაბარ ნაწილადაა გაყოფილი, რომელთა შორის შემორჩენილია არქიტრავული გასასვლელი. სათავსის დასავლეთ მონაკვეთში შემორჩენილია კამარის ნაწილი. ჩრდილოეთ მინაშენის დასავლეთ და აღმოსავლეთ კედლებში თაღოვანი სარკმლებია. ეკლესიაში დასავლეთ კუთხესთან დევს რელიეფური ქვების ფრაგმენტები და რამოდენიმე ხაჩკარი. ჩრდილოეთ მინაშენში დევს გარედან შემოტანილი სომხურწარწერიანი საფლავის ქვის ფილა.