ცურტავის მცირე დარბაზული ეკლესია

ცურტავის მცირე დარბაზული ეკლესია მდებარეობს ქვემო ქართლის მხარეში, ბოლნისის მუნიციპალიტეტის სოფელ ცურტავის ტერიტორიაზე.

დგას სოფლის ჩრდილო-დასავლეთ კიდეში, ბაზალტის კლდოვან ქანზე. ეკლესია მცირე ზომის დარბაზული ნაგებობაა ბაზალტის სხვადასხვა ზომის დაუმუშავებელი ქვით კირ-დუღაბზე. სამხრეთის ფასადზე ქვედა რიგად მეგალითური ქვებია გამოყენებული, რომელთა შორის არეები მცირე ქვითაა ამოვსებული. შესასვლელი სამხრეთ კედელშია გაჭრილი. კარი გარედან არქიტრავული ყოფილა, შიგნიდან თაღოვანი. ამჟამად იკითხება აღმოსავლეთის და სამხრეთის სარკმლების არსებობის კვალი. ნახევარწრიული აფსიდა მხრითაა გამოყოფილი. შედარებით ფართო სარკმლის თავის ფორმა არ ირკვევა. საკურთხევლის ჩრდ. ნიშა სწორკუთხაა, სამხრეთის - თაღოვანი. საკურთხევლთან ჩრდილოეთის კედელში კიდევ ერთი სწორკუთხა ნიშაა. დარბაზი თითო წყვილი პილასტრითაა გაყოფილი, რომელთაგან ჩრდილოეთისაზე ბაზალტის მარტივპროფილიანი კაპიტელია შერჩენილი. ეკლესია კრამიტით უნდა ყოფილიყო გადახურული.