წვირმის წმ. ბარბარეს ეკლესია

წვირმის წმ. ბარბარეს ეკლესია სვანეთში, მესტიის მუნიციპალიტეტის სოფელ წვირმში მდებარეობს. იგი განვითარებული შუა საუკუნეებით თარიღდება. ეკლესია დარბაზულ ნაგებობას წარმოადგენს, რომელსაც სამხრეთით მინაშენი ეკვრის. კედლის ნაშთები ჩანს ეკლესიის სამხრეთ-დასავლეთითაც, როგორც ჩანს, მინაშენი დასავლეთითაც ყოფილა. ეკლესია ორსაფეხურიან სადა ცოკოლზე დგას. შესასვლელი სამხრეთიდანაა. დარბაზი აღმოსავლეთით ნახევარწრიული აფსიდით სრულდება. აფსიდში მაღალი და თაღოვანი სარკმელია გაჭრილი. სარკმლის ორივე მხარეს თითო თაღოვანი, ხუთწახნაგა ნიშია მოწყობილი. ერთი ვიწრო, თაღოვანი სარკმელი დასავლეთ კედელშიცაა. საკურთხეველი ერთი საფეხურითაა შემაღლებული და დარბაზისგან ქვის კანკელითაა გამოყოფილი. კანკელი დაზიანებული სახითაა შემორჩენილი. გრძივი კედლები ერთი წყვილი პილასტრითაა დანაწევრებული. პილასტრებს ეყრდნობა დარბაზის ცილინდრული კამარის საბჯენი თაღი. ამჟამინდელი კამარა რკინა-ბეტონის უსახური კონსტრუქციითაა აღდგენილი. ინტერიერი შეულესავია. ფასადებს ფართო, თაროსა და ლილვისაგან შედგენილი ლავგარდანი ასრულებს. აღმოსავლეთის სარკმელს ლილვოვანი მოჩარჩოება აქვს. მინაშენს ორი შესასვლელი ჰქონია - დასავლეთითა და სამხრეთით, დასავლეთის შესასვლელი ამჟამად ამოქოლილია. მინაშენი აღმოსავლეთის თაღოვანი სარკმლით ნათდება. ეკლესია ნაგებია ნახევრად დამუშავებული ნატეხი ქვითა და ფიქალით, მოპირკეთებულია სუფთად თლილი შირიმის ფილებით. მინაშენი ფიქალის მშრალი წყობითაა ამოყვანილი, კარ-სარკმლის წირთხლებზე კი გამოყენებულია შირიმი.