ვაშლოვანის კოშკი

ვაშლოვანის კოშკი ქვემო ქართლის მხარეში, თეთრიწყაროს მუნიციპალიტეტის სოფელ ვაშლოვანში მდებარეობს. იგი 1811 წლით თარიღდება. აღსანიშნავია, რომ კოშკი არასოდეს გამოყენებულა საბრძოლო დანიშნულებით, ის ააშენეს, როგორც გასართობი და საბანკეტო ადგილი ქართველი არისტოკრატებისათვის და შესაბამისი სახელიც შეურჩიეს - “სალხინო”. ნაგებობა გეგმით წრიული ფორმისაა. აქ დაცული წარწერის მიხედვით კოშკის ქტიტორი რუსეთის არმიის გენერალ-მაიორი თამაზ ორბელიანია, ხუროთმოძღვარი კი - “ოსტატი გიორგი”. ვაშლოვანის კოშკი ნაგებია მონაცრისფრო, ადგილობრივი კლდის ნატეხი ქვით დუღაბზე. ნაგებობის მონოტონურობა დარღვეულია აღმოსავლეთიდან მიდგმული აგურის ლოჯიით. ლოჯიის წითელი, თეთრი და ყვითელი აგურებით შედგენილი მხატვრული წყობა ხაზს უსვამს აღმოსავლეთ მხარეს. აგურის წყობაშია ჩართული თაღოვანი შესასვლელი კარიც. კოშკი ოთხსართულიანია, თითოეულ სართულში თითო სადგომია, რომლებიც ერთმანეთთან კედელში დაყოლებული ქვის კიბითაა დაკავშირებული. კოშკს აქვს ბუხარი და აივანი. ინტერიერი ნათდება თაღოვანი სარკმლებით. ვაშლოვანის კოშკი აგებულია ძველი ფეოდალური არქიტექტურისათვის დამახასიათებელი ტრადიციების შერწყმით ახალ ფორმებთან.