ვერნების ეკლესია

ვერნების ეკლესია აჭარაში, ხულოს მუნიციპალიტეტის სოფელ ვერნებში მდებარეობს, სოფლის ცენტრში, შემაღლებულ ბორცვზე, რომელსაც "მადისძირს" უწოდებენ. იგი XI-XIII საუკუნეებით თარიღდება. ძეგლი ძალიან დაზიანებულია, გადარჩენილია მხოლოდ საძირკველი, საფეხურებიანი ცოკოლი და კედლის წყობის რამდენიმე რიგი. ეკლესია ოსმალთა ბატონობის ხანაში გაანადგურეს. ტაძარი დარბაზულ ნაგებობას წარმოადგენს, სამხრეთის მინაშენით, რომელიც საძვალედ იყო გამოყენებული. დარბაზი აღმოსავლეთით სწორკუთხედში მოქცეული ნახევარწრიული აფსიდით სრულდება. ძირითადი სივრცე გრძივი კედლების პროფილირებული პილასტრებითა და კამარის საბჯენი თაღებით სამ მონაკვეთად იყო დანაწევრებული. საკურთხევლის თაღიც იმპოსტებით ყოფილა შემკული. ტაძარს საგანგებოდ გამაგრებული საკმაოდ ფართო საძირკველი აქვს. ნაგებობა ორსაფეხურიან ცოკოლზე დგას. კედლები რუხი ფერის მოზრდილი ქვების პერანგითაა შემოსილი. დარბაზის შუა ადგილას, იატაკის დონეზე ჩაკირული იყო საკმაოდ დიდი ზომის ქვევრი. ეკლესიას ორი შესასვლელი ჰქონია - სამხრეთითა და დასავლეთით.