ზარათის წმინდა ივლიტასა და კვირიკეს ეკლესია

ზარათის წმინდა ივლიტასა და კვირიკეს ეკლესია იმერეთის მხარეში, წყალტუბოს მუნიციპალიტეტის სოფელ ზარათში მდებარეობს. იგი XIII საუკუნით თარიღდება. ეკლესია დარბაზულ ნაგებობას წარმოადგენს. მას ძველად დასავლეთით საქალებო ჰქონია, სამხრეთითა და ჩრდილოეთით კი - სამწირველოები. საქალებოს საძირკვლისა და სამწირველოების კვალი დღემდე შესამჩნევია. შესასვლელი ორია - დასავლეთითა და სამხრეთით. ტაძრის სახრეთით, დასავლეთითა და აღმოსავლეთით სარკმლებია გაჭრილი. ორივე კარი და აღმოსავლეთს სარკმელი ჩუქურთმებითაა მოჩარჩოებული. ეკლესიის ინტერიერი მოხატულია. ფრესკები XVII საუკუნით თარიღდება. საკურთხევლის კონქში დეისუსის კომპოზიციაა გამოსახული. ეკლესიაში გვხვდება ქრისტე ემანუელის, ეკლესიის მამების, ღვთისმშობლისა და იოანე მახარებლის, იოანე მახარებლისა და მთავარანგელოზების, საუფლო დღესასწაულების, წმინდანთა და მოწამეთა ფრესკები. აღსანიშნავია სამხრეთის კედელზე გამოსახული ღვთისმშობლისაკენ ვედრებით მიმართული მხატვარი. მსგავსი კომპოზიცია იშვიათია ქართულ კედლის მხატვრობაში. მოხატულობა გამოირჩევა ჟღერადი კოლორიტით. ტაძარი მოპირკეთებულია თლილი ქვით.