ჟახუნდერის წმ. გიორგის ეკლესია

ჟახუნდრის წმ. გიორგის ეკლესია სვანეთში, ლენტეხის მუნიციპალიტეტის სოფელ ჟახუნდერში მდებარეობს. იგი XI-XII საუკუნეებით თარიღდება. ეკლესია დარბაზულ ნაგებობას წარმოადგენს. დარბაზი გადახურულია კამარით, რომელიც პილასტრებზე გადაყვანილ საბჯენ თაღებს ეყრდნობა. პილასტრებიდან თაღები გრძივ კედლებზეც გადადის. ინტერიერი მოხატული ყოფილა, თუმცა დღესდღეობით ძალიან მცირე ფრაგმენტებია შემორჩენილი. ეკლესია ხუთი სარკმლით ნათდება, თითო სარკმელი გაჭრილია აღმოსავლეთის, დასავლეთისა და ჩრდილოეთის კედლებში, სამხრეთის კედელში კი ორი სარკმელია. ფასადები მოურთველია, მხოლოდ აღმოსავლეთის სარკმელს აქვს სადა დეკორი, ასევე გვხვდება ორი ერთმანეთის გვერდით განლაგებული რელიეფური ჯვარი და ლაპიდარული წარწერები. შესასვლელი ორია - დასავლეთითა და სამხრეთით. დასავლეთის შესასვლელი სწორკუთხაა, აღმოსავლეთისა კი - თაღოვანი. ეკლესია ნაგებია სუფთად თლილი შირიმის ქვით.