ჟამუშის მაცხოვრის ეკლესია

ჟამუშის მაცხოვრის ეკლესია სვანეთში, მესტიის მუნიციპალიტეტში, მულახის თემის სოფელ ჟამუშში მდებარეობს. იგი X-XI საუკუნეებით თარიღდება. ტაძარი დარბაზული ტიპისაა, დასავლეთის მხრიდან აქვს მინაშენი. მინაშენს სამხრეთის მხრიდან შესასვლელი აქვს, აქედანაა შესაძლებელი ტაძარში შესვლა. ნაგებობას აქვს მეორე შესასვლელიც, რომელიც მთავარი დარბაზის სამხრეთ კედელშია გაჭრილი. ტაძარს სამი მცირე ზომის, თაღოვანი სარკმელი აქვს. ფასადი გაფორმებულია პილასტრებზე დაყრდნობილი, ზედაპირის ჩაწევით შექმნილი, სადა თაღებით. დასავლეთის სარკმელიც ამ ტიპის თაღშია მოქცეული, რომელსაც თავზე ზედაპირიდან ამოწეული სადა თაღი აქვს. ეკლესია კოშკებიანი საცხევრებელი სახლების კომპლექსში დგას. ინტერიერში შემორჩენილია XIII საუკუნის მოხატულობა, სადაც საუფლო დღესასწაულთა სრული ციკლია წარმოდგენილი. აქ ასევე დაცულია X საუკუნის წმინდა გიორგის ჭედური ხატი და XVI-XVII საუკუნეების ხატები, ასომთავრული ვრცელი წარწერებით. ტაძრის ერთ-ერთი ხატი – მაცხოვრის ხატი იმერთა მეფე გიორგი II-ს შეუწირავს. წარწერაში მოხსენიებულია მეფეთ მეფე გიორგი, დედოფალი რუსუდანი და მათი ძე ბაგრატი.